fredag 17. oktober 2008

Oktoberblomstring

Det er enno noko som står i blom, men for det meste er plantene eit trist syn om dagen... I natt var det frost for første gang, men dei mindre herdige som ikkje har fått komme inn enno har klart seg fint likevel. Frost betyr jo høgtrykk og me har til og med sett sola i dag. Det var nesten for godt til å vere sant at det skulle vere fint og oppholdsver akkurat på fridagen min. Og nok eit mirakel; jentungen sov i heile to og ein halv time i dag, dermed fekk mora ei lang og god arbeidsøkt i hagen. Endeleg.

Fekk satt ned massevis av planter som har stått i potter, diverse høstsalgkupp, Jensenplanter og ting eg har flytta hit frå parsellen. For å gjøre plass måtte eg røske vekk sommarblomane, men det var jo i grunnen på tide. Og så har eg bestemt meg for at kjøkkenhagen får bli ventebed i vinter. Eg innser vel at eg ikkje kjem til å bli ferdig med det planlagte bedet bak huset, så dei siste plantene som skal hit frå parsellhagen får finne seg i å bli gravd ned mellom purre og grønnkål. Så lovar eg at dei skal få ein permanent plass til våren! (Håpar berre det er plass til to blåbærbuskar, to aroniabuskar, tre bjørnebærplanter, ein magnolia, to små epletre, eit tjuetals stauder og sikkert meir eg har gløymt...)

Og forresten har eg fått ei utmerking frå Dagny i Heim-bloggen, ho sender meg 'You make me smile-award'. Tusen takk Dagny, det set eg pris på!

Oktober 140 Oktober 166 Oktober 165

Oktober 160 Oktober 164 Oktober 159Oktober 172 Oktober 167

(Blomsterert, skabiosa, løvemunn 'Black Prince', kjempeverbena, mørkkongslys, purpursolhatt, blåsalvie, blodbeger)

søndag 12. oktober 2008

Nytt liv i hønsehuset

I dag kom denne vesle forskremte flokken i hus. Vår stakkars eine gjenlevande høne måtte jo få selskap, så no har klart å skaffe fire tverrstripa Plymouh Rock og tre brune italiener. Foreløpig bur dei i kjellaren under ei varmelampe, om ein månad eller to håpar me å kunne flytte dei ut i hønsehuset. Dei minste er ei eller to veker gamle, dei største nærmar seg vel ein månad. Italienerane ser ut som små ryper, nydelege!

oktober 131

Eit godt naboskap

Denne cosmosen planta eg i vår i det einaste bedet som var i hagen då me overtok. Ikkje visste eg at det skulle kome opp ei astilbe i nøyaktig same farge akkurat der! Dei kler kvarandre, synest eg.

September 178

torsdag 2. oktober 2008

Høne RIP

I dag har det hendt noko trist her. Eg sto på kjøkkenet og bakte blåbærmuffins (som seg hør og bør i ein blåbærhage) då eg plutseleg høyrde eit voldsomt spetakkel utanfor. Eg sprang ut og der hadde det jammen vore ein hund i hønsegarden og fått med seg to høner ned i hagen til naboen. Eg fòr etter og klarte å redde den eine, bar ho opp igjen i hønsehuset og ned igjen for å jage hunden. Då eg kom fram til den stakkars fine wyandottehøna mi var det framleis liv i henne, men det var tydeleg at ho sang på siste verset. Eg la henne forsiktig inn i huset og tok ut etter hunden. Anar ikkje kor den kom fra, det var ein golden retriever med halsband og alt, eg vil tru den har stukke av frå turgåarar på fjellet bakom her. Den forsvant i alle fall fortare enn svint når eg jaga den.

Ti minutt seinare var høna daud. Veldig trist og veldig unødvendig. Eg har ingen kvaler med at dyr må dø, me har jo slakta tre av hanekyllingane våre og hatt ein av dei til søndagsmiddag. Men dette er noko heilt anna, denne høna skulle me jo ha i mange år! Eg hadde tenkt å lage namnekonkurranse på bloggen for å finne eit bra namn til ho og søstra, me skulle få dei riktig håndtamme og det skulle vere så fint. No har me berre den grå høna igjen, og ein svart hane. Hanen er lova vekk til søstra mi, men stakkars siste høna kan jo ikkje bli igjen åleine! Uff og uff, dette er trasig.

mandag 29. september 2008

Nye planter

I dag kom plantene eg har bestilt frå Jensen si planteliste, der er det haustsalg på masse spennande og uvanlege vekster. Eg var ganske beskjeden i bestillinga, og i ettertid gremmer eg meg vel egentlig over at eg ikkje bestilte meir. Hosta 'Blue Mouse Ears' for eksempel. Men det får så vere, eg fekk jo mykje fint, då:
1 Angelica 'Ebony'
1 Athyrium nipponicum 'Pictum'
1 Carex 'Ice Dance'
1 Geranium 'Blue Sunrise'
1 Iris chrysographes 'Black Form'
1 Iris sibirica 'Snow Queen'
1 Iris sibirica 'Roanoke's Choice'
1 Viola sororia 'Rubra'

Så no håpar eg på ein fin ettermiddag snart så eg kan få det i jorda. I dag høljar det og hagen er eit gjørmebad...

lørdag 27. september 2008

Tre ukjente Heuchera

Ja, desse tre har eg i hagen og lurar på kva det er for sorter... Dei to på det første bildet har hatt namnelappar ein gong, men dei er for lengst borte. Den siste kjøpte eg umerka no i sommar. Nokon som kjenner dei?

Solsikker frå fuglebrettet

Ja, sånn kan det gå når dei fjærkledde hamstrar solsikkefrø og gjømmer dei vekk i ein lita grop. Her kom det opp fire-fem planter i ei klynge i sommar. Me trudde aldri desse skulle få tid til å blomstre før hausten, men jammen santen... Dei lyser verkeleg opp som soler, neste år skal me så sjølve!

September 161 September 163

fredag 19. september 2008

Duftgladiol - Acidanthera bicolor


Det er kaldt, surt og vått ute, det høljar og det bles. Eg vakna kl. 03 i natt av lyden av haust, og priste meg lukkeleg for fridagar på fredagar. Så i dag held eg meg inne og prøver å underhalde ei sur og gretten lita jente. Takk og lov for formiddagslur så mor kan få surfe litt.

På ein dag som dette treng me ei oppmuntring. Og så kan ein jo spørre seg sjølv om det verkeleg er sant at det berre er eit par-tre dagar sidan sommaren på dette bildet.

tirsdag 16. september 2008

Ein overlevande

Denne opiumsvalmua dukka opp i hagen i sommar. Lurar på kor lenge frøet har lege i mørket før det vart vekt til live når eg begynte å rote i jorda?

September 142 September 144

mandag 15. september 2008

Hønene våre

Enkelte vil kanskje huske at me har høner i Blåbærhagen, eg har skrive om då me fekk kyllingar i vår. No er det visst på tide med ei oppdatering. Av seks kyllingar viste det seg at fire var hanar... Dei har begynt å vekke oss med galing om morgonen og kva skal eg seie... dei blir nok ikkje gamle hos oss. Men flotte er dei! Me har heldigvis avtale om å få "bytte inn igjen" den eine, søstra mi vil ha ein svart hane og kan gi oss ei svart høne i staden. så kan me supplere med eit par høner til neste år. September 110

Lenge har dei stakkars fuglane levd i eit veldig provisorisk hus. Skjønt hus er vel å overdrive, kasse er nok meir beskrivande. Men dei har hatt ein fin og stor hønsegard, og på sommaren har det ikkje vore så farlig korleis taket over hovudet såg ut. Men no nærmar vinteren seg og fuglane er blitt altfor store for det vesle skjulet, så me har endeleg fått på plass eit skikkeleg hønsehus. Steg-for-stegbilder av byggeprosessen følger i eige innlegg seinare. Hønene har levd herrens glade dagar i helga då huset endeleg vart sett på plass, dei fekk nemlig gå fritt i hagen mens den nye hønsagarden blei sett opp. Me måtte jage dei frå kjøkkenhagen eit par gonger men elles gjekk det overraskande greit, dei heldt eg i utkanten under nokre buskar, og storkoste seg. Veldig dekorative, synest me. Dei to brunspettete er av rasen Wyandotte, den lyse Isbar og dei tre grå og svarte er Australorps.

August 079 August 108 August 364 August 100 August 371