Sommarbukett

Ein fargerik bukett frå hagen med stikle, engnellik, vivendel, småhjerte, knautia, astrantia, alunrot, penstemon, og eit par svarte blad frå hyllen 'Black Lace'. Eit herlig kaos, litt sånn som hagen er for tida. På eit eller anna tidspunkt, vanlegvis i midten av juli, mister eg fullstendig kontroll og alt løper løpsk - på godt og vondt. Det får det berre gjøre, eg har tenkt og kose meg i hagen utan å stresse så får den heller berre vere vill og kaotisk. Det har sin sjarm, det også (seier eg høgt og tydeleg til meg sjølv).

Midtsommarbukett

Strengt tatt burde dette vore ein forsommarbukett, sidan både syrin og dagfiol er forsommarblomar. Men den kalde våren forsinka alt, og den kvite syrinen vår som er litt seinare enn mange andre syrinar står i fullt flor akkurat no. Begge delar er arv etter tidlegare bebuarar her i hagen, syrinen er stor og flott sjølv om den veks ut av ei steinrøys og dagfiolane sår seg sjølv i same steinrøysa med beundringsverdig iver. Fint å ha så mykje at ein kan riktig fråtse når ein skal plukke, og det gjorde eg verkeleg her. Buketten blei gedigen, mykje større enn tenkt, men av og til er jo det litt moro også. Ikkje minst er den ei real duftbombe som har parfymert heile stova dei siste dagane.

Elles har eg brukt marikåpe, hundekjeks, sølvbunke, rødkløver, småhjerte, grasløkblomar, akeleier og Geranium phaeum. Som grønt fyll brukte eg kvistar frå skjærsminen, den står i knopp enno men er nesten klar til å bli neste duftbombe i hagen.

Lys- og mørkebukett

Eg prøvde meg på å bruke hønsenetting som armering nede i vasen denne gongen, for å halde stilkane betre på plass. Det funka kjempefint, det er jo veldig nyttig i ein sånn litt vid, grunn vase som dette. Det blir meir som eit arrangement enn ein bukett, du kan få til litt andre fasongar enn i ein vanleg vase. 

Her har eg brukt ein blanding av heilt lyse blomar og mørkt bladverk, spesielt fint syns eg et blei med frøhovuda av kubjelle (Pulsatilla vulgaris). Elles har eg brukt Trollius 'Alabaster', Geum 'Lionel Cox', duppesoleie, marikåpe, akeleia 'Black Barlow' og ymse Geranium phaeum. Den held seg faktisk ganske godt i vase, i motsetnad til dei fleste andre storkenebba. Bladverket er frå Astilbe, Heuchera og Cimifugia 'Brunette'. Duppene byrka ganske fort å drysse men resten heldt seg veldig bra. 'Alabaster' var heilt nydelig til snitt, det må eg huske til framtidige bukettar!

Glimt frå hagen

Neste år vil eg ha fleire tulipanar. Maihagen er litt fargeluas og kjedelig etter at alle vårens krokusar og scillaer er ferdige. For nokre år sidan satte eg ein del løkar av tulipanen 'Purissima', eg trur det kan ha vore 30 stk. Tre år seinare er det sikkert dobbelt så mange her, kanskje litt mindre men likefullt nydelige. Til hausten må eg leite opp fleire slike tulipanar som kjem igjen år etter år, med litt meir farge på. For dei lyser virkelig opp ute no!

Denne primulaen, 'McWatts Cream', har nøyaktig same farge som tulipanane og er minst like villig. Denne har eg sikkert hatt i 7-8 år, den har blitt delt fleire gonger og dannar fort store, frodige tuer. Til sommaren skal den delast igjen og plantast i ein litt meir halvvill setting under eit epletre i lag med snøklokker, narsisser og lungeurt. Målet er at det skal bli litt som dette på sikt. 

Den blå lungeurten blomstrar ufortrødent vidare, og er enno like fin. Snart får den selskap av ein lysegul ballblom og kvite dupper, det blir nok også fint!

Ruteliljene er ein absolutt favoritt. Eg vil ha mange, mange, men enn så lenge har eg berre desse to.  Forleden kom eg over denne akvarellen av Charles Rennie Mackintosh, rutelilja må jo vere den perfekte blomen for Art Nouveaustilen!

I går var det også tid for å plukke den tradisjonelle bursdagsbuketten til meg sjølv, i år lagde ein ein stor ein med masse bladverk sidan det ikkje var så mykje blomar å hente. Her er rognespirea, hegg, alperips, blomstrande blåbærlyng, villbringebær, raudhyll i knopp, billardspirea, storkonvall (som ikkje er heilt utsprungen enno), pinseliljer, ei enslig påskelilje og tulipanar. Til og med den forhatte platanlønnen viser seg å vere ganske fin i knopp, og fekk vere med som eit lite skulpturelt innslag.

Ein liten, gul vårbukett

Ja, no er tida her, sesongen som me har lengta sånn etter, då ein kan gå rett ut i hagen og samle saman ein bunt blomar som ein liten smakebit på årstida. Her er våren, slik den ser ut i vinduskarmen i dag!

Primula McWatts Cream, Euonymus fortunei 'Emerald Gaiety' og Doronicum frå hagen, blåbærlyng og ein slags vier med gåsungar frå skogkanten.

Ein raud og ein blå bukett

Eg gjekk jo ut her for ei tid tilbake og sa at eg helst ville unngå å kjøpe blomar frå butikken. Men forrige helg gjekk eg på ein smell. Eg hadde litt for god tid til bussen på fedag ettermiddag og rakk å stikke innom blomsterbutikken for å snoke. Og då klarte eg ikkje stå imot raudoransje papegøyetulipanar og ranunklar, og sidan det var to for tre så tok eg likegodt med ein pakke voksblomar også. Eg driv nemlig og planlegg snittblomsthagen min, ein del frø er i jorda allereie og andre ventar på å bli sådd, og det klør i fingrane etter å begynne å klippe og sette saman bukettar. Så då falt eg altså for fristelsen denne gongen. Men eg supplerte i det minste med grønt frå hagen - alperips, rognspirea, blåbærlyng og vivendel kom med i buketten. Slik blei det tilslutt:

Då me nærma oss denne helga var ranunklane og tulipanane på hell, men det grøne og voksblomane heldt framleis stand. Dermed rauk det raude ut og eg henta inn blått frå hagen i staden. Lungeurt og perleblom vart veldig fine mot det vårgrøne, syns eg. No har både alperipsen og blåbærlyngen blitt drivne i blom, dei er veldig smålåtne men også veldig søte, syns eg. Og denne er altså nesten berre frå eigen hage, med unntak av dei kvite voksblomane. Som eg gler meg til å ha masse, masse å ta av når sommaren kjem!

Flaskefunn

Me har skrive tidlegare om alt som dukkar opp når me graver i jorda her hos oss, alt frå gamle potteskår til leikebilar. Nokre av dei meir sjarmerande funna har vore flasker - gamle medisin- og parfymeflasker trur eg, nokon av dei ser faktisk veldig gamle ut. Dei aller fleste er knuste, men innimellom dukkar det opp nokre heile. Hvis fasongen er fin så blir dei tatt med inn og vaska. Denne vesle samlinga tar seg godt ut i vinduskarmen med blå vårblomar frå hagen!

Blå lungeurt, perleblomst, småsymre og blåstjerne.

Fint i hagen i dag

Eg har hatt fri i dag, påskeferien er i gang og det er vår i hagen. Kan det bli betre? Riktignok byrja å regne etterkvart, men før det fekk eg vere ute og rote litt rundt ei stund og leike meg med kameraet. Her er noko av det eg fann:

Blåbærlyng i knopp, raudhyll i ferd med å springe ut, lungeurt av ulike slag, den siste snøklokka, assortert lav og mose, egg frå Barnevelderhøna, topp av kuleprimula

Corydalis, veit ikkje kva for sort - den kom frå eit plantebyte eller planteloppis merka som "rød lerkespore". Sprer seg fint, no har eg fleire små tuer rundt omkring

Primula rosea 'Gigas' står også på spranget

Ein blå lungeurt eg fekk med meg frå parsellhagen i si tid, knall knall blå

Årets første bukett

... er ikkje store saken, men du verden så glad eg blir av den!

Elles har eg fått laga meg ei såliste, i år skal det nemlig vere system i galskapen. Forhåpentligvis.

Så er det vinter...

...og det er på tide med eit livsteikn. Det har vore stilt her lenge. Det har ikkje vore den mest inspirerande sommaren, kaldt og vått og breiflabb overalt. Ok, ikkje breiflabb kanskje, men storkjefta klauvdyr har her i alle fall vore. Hjortegjerdet har fungert fint, men det hjelper ikkje når naboen manglar nokre meter på si side og løyser problemet ved å spenne opp hyssing mellom nokre buskar. Så hjorten kom seg inn eit par gonger og fekk gjort litt skade i år også. Verst gjekk det utover fem nykjøpte frukttre som knapt hadde kome seg i jorda. Er det rart ein stakkar går litt hagelei?

Elles har me utvida hagen med eit halvt mål steinrøys, me har fått kjøpt den ubyggbare nabotomta for ein relativt billig penge. Der er det overgrodd med villnisspirea og parkslirekne, men eg trur me skal få skikk på det. Det blir mannen i huset sitt prosjekt, han og minsteguten skal vere heime heile våren og gjøre nybrottsarbeid. Han har planar om andedam, kaninoppdrett og drivhus der borte, bøkehekk mot skogen og frukttre i skråningen. Stakkars mann, han trudde han gifta seg med ei hagegal dame men no har eg visst mista gløden. Heldigvis er han i stand til å bere fakkelen åleine for tida, så får me satse på at eg kjem tilbake til det med tid og stunder. I mellomtida har eg tilbudt han å bli gjestebloggar på Blåbærhagen, kanskje han slår til på det? Eller kanskje eg blir flinkare sjølv framover, eg merkar no at det var fint å vere tilbake!

Og det er fleire grunner til at hagen ikkje har vore i fokus i sommar, eg har hatt det travelt med heilt andre ting. Ein liten nettbutikk har det blitt og eg har brukt mykje tid på å sette meg inn i det tekniske, leite opp leverandørar, fikse ditt og datt. No er den ferdig og eg er fornøyd! Så om du er ute etter miljøvennlege hobbyartiklar som metervare i økobomull eller resirkulerte papirvarer er dette staden å gå, og velkomen skal du vere.

Haustkrans av bjørkeris, snøbær, mispel og salvie, inspirert av Moseplassens instruksjonsvideo

Kransar

Eg laga meg eit par kransar her om dagen, med materialer frå skogen og hagen. Det einaste som ikkje kom herfrå var ei grein med kristtorn som me henta hos søstra mi som bur i kristtornland. Me var der helga for to veker sidan for å hente juletre i skogen, ein nyetablert tradisjon som me håpar skal bli langvarig. Ho bur på eit småbruk med tilhøyrande skog og der er ein del smågraner også. I og med at skogen mild sagt er i brattelia kunne ikkje eg vere med med opp i år. Men mannen min ordna saken, og var flink og tok med kristtorn til meg også. Han veit kva eg vil ha, den fyren! Gran og kristtorn vart parkert utanfor huset ved nedkomsten frå fjellet mens ekspedisjonen fòr inn for å varme seg på kaffi og julekaker, det var surt og sterk vind den helga. Trur du ikkje kristtorngreina mi blåste metervis avstad rett inn i kalkungarden der den umiddelbart vart hoppa på av to svære bronsekalkuner som syns bæra såg veldig fristande ut... Resultatet var at eg har omlag seks bær igjen på kransen min.

I slle fall, den store kransen som heng på inngangsdøra er mose på halmkrans, blåbærlyng, tyttebærlyng, einer med bær, gravmyrt, lav og kristtorn. Så ville eg lage ein til, den er enklare men med stort sett same materialer berre på ein krans av vridde kvistar. Den heng på hønsehuset, fjørfeet set nok pris på litt julestemning tenker eg.

Adventspynt frå skogbunnen

Anne på Moseplassen oppfordrar til å legge ut bilder av dekorasjonar, kransar og slikt i desse juletider. Og det kan ein jo! Som ho peiker på er det mykje sånt ute og går i bloggane no, sjølv er eg nok ikkje like opptatt av å pynte, stæsje og style som mange andre. Me har ein gamal adventsstake i messing, ganske kjedelig i grunnen. I år ville eg gjøre ein ny vri så eg fann fram eit gamalt Figgjofat eg kjøpte på loppis for mange år tilbake, og stavra meg ut i skogkanten for å sanke materialer. Mose, blåbærlyng, lav, mispelbær, gravmyrt, nokre furukongler og eit blad frå ei av julerosene får gjøre nytta denne gongen. Den gamle staken blei satt oppi fatet og dekka av alt det grøne, blada og lyngen dandert rundt om kring og vips så var det noko nytt. Sikkert ein smule brannfarlig men då får me heller passe godt på.

Bilder inne er vanskeleg i denne mørke tida, men eg gjorde eit forsøk, og jammen kom ikkje skuggen av julestjerna med også, heilt til venstre!